عربات الفول ومادة ال EDTA الكيميائيه
________________
________________
انا عارف مادة ال EDTA من زمان وعارف تقريباً اغلب استخداماتها في العالم كلّه , الا انّي فوجئت بتقرير في احدى الصحف المصريه النهارده عن استخدام جديد ليها في مصر ...
مادة ال EDTA فكرة عملها ببساطه في انّها بتتحد مع العناصر المعدنيه وبتحبسها وبتمنع انها تتفاعل مع اي حد تاني , الماده دي اغلب استخدامها بتبقى في المصانع في صناعة المنسوجات مثلاً , الصابون , مساحيق الغسيل , كماده حافظه وبتبقى بنسب عالميه معروفه ومحسوبه ..
بم اّني دكتور فعارف ان الماده دي بيستخدموها طبياً في حالات قليّله اوي , زي في حالات التسمم بالعناصر المعدنيه زي تسمم الزئبق مثلاً , يدّوا العيان EDTA فتتحد مع العناصر المعدنيه دي ويمنعوا تفاعلاها ويخرّجوها من الجسم , وليها استخدامات بسيطه في مجال علاج الاسنان بردو ..
في #مصر بقى فيه كائن فكّر تفكير شيطاني ولقى انّه لما يحط ال EDTA دي على الاكل بيستوي بسرعه , ومعرفش ايه السبب العلمي بالظبط الصراحه , يمكن ال EDTA تقريبا بتاخد كل المعادن من الأكل فبتخلّيه اضعف في انّه يتحلل ويستوي ...
المهم التقرير في الجريده المصريه بيقول ان اغلب عربيات الفول بتستخدم هذه الماده الكيميائيه عشان يخلّوا الفول يستوي بسرعه وميستهلكوش غاز كتير ... الاخ يقوم كابش كبشة EDTA وفي القدره وانت ونصيبك بقى ...
دوّرت شويّه على النت عن المخاطر الصحيّه لاستخدام ال EDTA لمده طويله , ملقتش كلام كتير , لانها اصلا محدّش هيستخدمها لمدّه طويله , بس طبعاً مكنوش يعرفوا ان فيه عبقري في مصر هيحطّها على الفول بالكميات دي ..
________________
لقيت في الآخر موقع كاتب المخاطر الصحيّه لاستخدامها لمده طويله :
الفشل الكلوي / تليّف الكبد / اضطرابات في عضلة القلب
هشاشة العظام / مشاكل في الجهاز التنفسي ...
هشاشة العظام / مشاكل في الجهاز التنفسي ...
فيه أمراض كتير اوي بس تخصصيه جداً , ممكن ميفهمهاش غير الدكتور , فانا اكتفيت وكتبت لكم بس بدول .
0 التعليقات
